ცნობილია - სად გაიყიდება საქართველოს თამაშების ბილეთები ევროპის ჩემპიონატზე
როგორც მოგესხენებათ, საქართველოს ეროვნული ნაკრები ერთა ლიგაზე ტრიუმფის შემდეგ ევროპის ჩემპიონატზე გავიდა.
ბუნებრივია, ქართველი გულშემატკივარი მაშინვე გერმანიაში ჩასატარებელი ჩემპიონატის ბილეთების საკითხმა დააინტერესა. აღნიშნულთან დაკავშირებით განცხადება საქართველოს ფეხბურთის ფედერაციამ გააკეთა:
„უპირველესად, კიდევ ერთხელ გილოცავთ ამ ისტორიულ გამარჯვებას!
როგორც იცით, ევროპის ჩემპიონატზე საქართველო ერთადერთი დებიუტანტი ქვეყანაა. ევროპის ჩემპიონატის საგზურის მოპოვების შემდეგ, უეფას ევროპის ჩემპიონატის წარმომადგენლებთან აქტიურ ფაზაში გადავიდა სამუშაო პროცესი სხვადასხვა საორგანიზაციო საკითხებთან დაკავშირებით.
როგორც მოგეხსენებათ, ევროპის ჩემპიონატი უეფას ეგიდით ტარდება შესაბამისად, ბილეთების რეალიზაცია მათი უშუალო ჩართულობით იმართება. ამ ეტაპზე მიმდინარეობს საბოლოო დეტალების დაზუსტება ბილეთების გაყიდვის პროცედურასთან დაკავშირებით.
ბილეთების გაყიდვა უეფას ბილეთების ოფიციალური პორტალის საშუალებით წარიმართება. უახლოეს დღეებში, უეფასგან დეტალური ინფორმაციის მიღების შემდეგ, ფეხბურთის ფედერაცია სრულ ინფორმაციას მიაწოდებს გულშემატკივარს საქართველოსთვის განკუთვნილი ბილეთების რეალიზაციასთან და თარიღთან დაკავშირებით.
მადლობა მხარდაჭერისთვის, კიდევ ერთხელ გილოცავთ ისტორიულ გამარჯვებას და შევხვდებით გერმანიაში!“, – აღნიშნულია გავრცელებულ ინფორმაციაში.
