ლელა წურწუმიას ეკა კახიანმა დიდი ხნის დანაპირები აუსრულა: "ძალიან ლამაზი გამოგვივიდა"

რადიო „ფორტუნას“ გადაცემა „არტ-FM“-ს ეკა კახიანი და ლელა წურწუმია სტუმრობდნენ ახალი სიმღერის – „შენთან ერთად“ პრემიერით.

ეკა კახიანი:

ყოველთვის ძალიან მინდოდა, რომ ლელას ჩემი სიმღერა შეესრულებინა, თუმცა აქამდე რატომღაც არ გამოდიოდა. რამდენიმე თემა მოვასმენინე და ის აირჩია, რომელიც მისთვის ყველაზე ახლობელი აღმოჩნდა. სიმღერის ტექსტზე ირინა სანიკიძემ, არანჟირებაზე გიგა კუხიანიძემ იმუშავეს, სიმღერა კი ლელამ და მაკა ზამბახიძემ შეასრულეს დუეტში.

ლელა წურწუმია:

ეკა დიდი ხნის წინ შემპირდა სიმღერის დაწერას, საბოლოოდ, როგორც იქნა, სახლში შემოვიტყუე და სწორედ იქ მოვისმინე პირველად „შენთან ერთად“. თუმცა, სიმღერა ჯერ არ იყო სრულყოფილი, ამიტომ გიგას დახმარება დაგვჭირდა. ყველაფერი ძალიან ოპერატიულად მოხდა, ირინამაც რამდენიმე დღეში შექმნა არაჩვეულებრივი ტექსტი. თავიდან მარტოს უნდა მემღერა, თუმცა მამულიჩას რჩევით, მე და მაკამ დუეტში ჩავწერეთ. ძალიან პოზიტიური კომპოზიცია გამოვიდა, ამიტომ კლიპიც შესაბამისი უნდა ჰქონოდა. საბოლოოდ, ძალიან ლამაზი მუსიკალური ვიდეო გამოგვივიდა, რომელიც რატი დურგლიშვილის სახლში გადავიღეთ.