რას ეუბნება მეუფე შიო კათოლიკოს-პატრიარქს?

კათოლიკოს-პატრიარქის მოსაყდრემ, მეუფე შიომ, სამების საკათედრო ტაძარში სადღესასწაულო წირვის დასრულების შემდეგ საქართველოს კათოლიკოს-პატრიარქის, ილია II-ის ღვაწლზე ისაუბრა. მან აღნიშნა, რომ პატრიარქის აღსაყდრებით 1977 წლის 25 დეკემბერს ქართული ეკლესიისა და ქვეყნისთვის ახალი ეპოქა დაიწყო.

თქვენო უწმინდესობავ და უნეტარესობავ, დღეს მთელი საქართველოსთვის ღირსშესანიშნავი და სასიხარულო დღეა. ჩვენ აღვნიშნავთ კათოლიკოს-პატრიარქის ტახტზე თქვენი აღსაყდრების 47-ე წლისთავს. მაქვს პატივი, საქართველოს სამოციქულო ეკლესიის, წმინდა სინოდის სახელით გულითადად მოგილოცოთ ეს მნიშვნელოვანი თარიღი,“ – განაცხადა მეუფე შიომ.

მეუფემ ხაზი გაუსვა, რომ 1977 წელი იყო განსაკუთრებული დრო, როდესაც საქართველო დიდი გამოწვევების წინაშე იდგა და ეკლესიის წინამძღოლისგან სჭირდებოდა განსაკუთრებული მოთმინება, სიბრძნე და სიყვარული.

1977 წლის 25 დეკემბერს, სვეტიცხოვლის საპატრიარქო ტაძარში თქვენი აღსაყდრებით ჩვენი ეკლესიისა და ქვეყნისთვის ახალი ეპოქა დაიწყო. ეს იყო პერიოდი, როდესაც საქართველო დიდი გამოწვევების წინაშე იდგა და წინ ურთულესი ათწლეულები გველოდა. ამიტომ ეკლესიის მეთაურს მართებდა განსაკუთრებული მოთმინების, სიბრძნის, მოწყალების და სიყვარულის გამოვლინება. ჩვენ ვმადლობთ უფალს, რომ მან თქვენი სახით სწორედ ასეთი თვისებების მქონე სულიერი წინამძღოლი მოგვივლინა,“ – აღნიშნა მეუფემ.

მან ასევე პატრიარქის 47-წლიანი მსახურების მრავალმხრივი მნიშვნელობა აღნიშნა და განაცხადა, რომ ილია II-ის ხელმძღვანელობით ეკლესიამ შეძლო ქვეყნის სულიერი და კულტურული აღორძინება. მეუფე შიომ მადლობა გადაუხადა პატრიარქს მისი დაუღალავი შრომისთვის და ერთგულებისთვის ეკლესიისა და საქართველოს წინაშე.

ეს დღე საქართველოსთვის განსაკუთრებული იყო, რადგან აღინიშნა არა მხოლოდ პატრიარქის აღსაყდრებიდან 47 წელი, არამედ ისიც, თუ როგორ იქცა ილია II ეროვნული ერთიანობის სიმბოლოდ და სულიერ შუქურად მრავალი თაობისთვის.