საფრთხე ადამიანებისთვისაც? - მეცნიერები შეაშფოთა ოკეანეში "კოკაინის ზვიგენების" გამოჩენამ
მსოფლიოში ოკეანეების ანთროპოგენური დაბინძურება სხვადასხვანაირად ვლინდება. თუმცა ერთ-ერთი ყველაზე უჩვეულო და გამორჩეული მაინც "კოკაინის ზვიგენების" გაჩენა იყო, რის შესახებაც გასული თვის ბოლოს გახდა ცნობილი.
23 ივლისს, ბრაზილიაში, რიო დე ჟანეიროს სანაპიროების წყლებში ბინადარი ზვიგენების ორგანიზმში მეცნიერებმა კოკაინი აღმოაჩინეს.
პრობლემა მწვავედ დგას ამერიკის სანაპიროების მახლობლად, სადაც ნარკოტიკებით ვაჭრობის ძირითადი საზღვაო გზები გადის. ასევე ხშირად ნახულობენ პლიაჟზე კოკაინის შეფუთვებს, რომლებიც, დიდი ალბათობით, წყალშიც ხვდება.
ბრაზილიელმა ბიოლოგთა ჯგუფმა კოკაინისა და მისი კომპონენტების მაღალი კონცენტრაცია (კერძოდ ბენზოილეკგონინი) ბრაზილიურ გრძელცხვირა ზვიგენების სხეულში პირველად აღმოაჩინა.
კვლევის დროს, შეისწავლეს რიო-დე-ჟანეიროს მახლობლად დაჭერილი ცამეტი ზვიგენი. ხოლო მათი ქსოვილების საფუძვლიანმა ქიმიურმა ანალიზმა, დაადასტურა კოკაინისა და მისი ელემენტების არსებობა ღვიძლსა და კუნთებში, ერთი ზვიგენის გარდა. კოკაინის მაქსიმალური რაოდენობა იყო 10,75 მიკროგრამი 1 კილოზე.
როგორც მეცნიერები აღნიშნავენ, ნარკოტიკები დამანგრეველ გავლენას ახდენს ზვიგენების ჯანმრთელობაზე, რომელთა მრავალი სახეობა გადაშენების პირას არის. ზვიგენების ორგანიზმში კოკაინის არსებობა იმაზე მეტყველებს, რომ ამან შესაძლოა ზღვის სხვა არსებებიც დააზარალოს.
ამავდროულად, კოკაინით "დაბინძურებულმა“ თევზმა ასევე შეიძლება საფრთხე შეუქმნას ადამიანის ჯანმრთელობას, იმ შემთხვევაში თუ თევზს საკვებად გამოიყენებს.
13-ვე გამოკვლეული ზვიგენი ორსულად იყო, თუმცა კოკაინის მაღალი შემცველობის შესაძლო შედეგი ზვიგენების ნაყოფზე უცნობია.
კოკაინის პოტენციური გავლენა ზვიგენების ქცევაზე სიღრმისეულად გამოკვლეული ჯერჯერობით არ არის. ეს პირველი კვლევაა, რომლის ფარგლებშიც ზვიგენთა ორგანიზმში კოკაინის მაღალი კონცენტრაცია აღმოაჩინეს.
