"ვიგრძენი, რომ მშობლობა, საკუთარ თავზე გადაჭარბებაა" - გიორგი კეკელიძე ქალიშვილზე

პოეტი და მწერალი გიორგი კეკელიძე, რომელიც ცოტა ხნის წინ მამა გახდა, მამობაზე თავისი გულწრფელი და ემოციური ფიქრები გაზიარეს "პრაიმტაიმთან" მიცემულ ინტერვიუში. მისი ქალიშვილი - კეკე კეკელიძე 7 მაისს დაიბადა.

ინტერვიუში, რომელიც კეკელიძემ "პრაიმტაიმს" მისცა, მამობის ახალ რეალობაზე ისაუბრა:

- ახალი შეგრძნებები...

- ჯერაც დაკვირვების და გაკვირვების პროცესია. ცოდნის და განცდის მორიგების ამბავი. დრო უფრო გამიიოლებს ზუსტ პასუხს.

- ფიქრები?

- ბევრს მოეხსენება ჩემი ობსესიურობის საქმე, ჭარბ ფიქრებს აქამდეც არ ვუჩიოდი - ახლა ვცდილობ, რომ პირიქით, გამოვხშირო ისინი და კეკესთვის სასარგებლო დავიტოვო. მარტივი ბრძოლა არ არის.

- რა შეიცვალა შენში?

- ვიგრძენი, რომ მშობლობა საკუთარ თავზე გადაჭარბებაა.

- მამაზე ხშირად წერ. როგორ გინდა, რომ ათწლეულების შემდეგ კეკე საუბრობდეს თავის მამაზე?

- მინდა, გამომივიდეს და ამ სასტიკ სამყაროში, მსუბუქი მეხამრიდი მაინც ვიყო მისთვის. ნაკლები ტკივილი და იმედგაცრუება იგრძნოს, რაც, თუნდაც მე გამოვცადე.

- ეს ციცქნა გოგო შენი წიგნების ახალ პერსონაჟად გამოიძერწება?

- ვნახოთ. ოდესმე ალბათ კი. ახლა მთავარი ტექსტი თვითონ არის, რომლის კითხვასაც ვსწავლობ.

- უკვე დიალოგში ცდილობ შეხვიდე. გინდა მალე დაგელაპარაკოს?

- ჩვენ უკვე ვლაპარაკობთ. თვალები ყოფნის ამისთვის. მასაც და მეც.

გიორგი კეკელიძის გულწრფელი განცდები მამობაზე მკითხველს კიდევ ერთხელ აგრძნობინებს, რომ ნამდვილი ლიტერატურა და ჭეშმარიტი ემოცია სწორედ ცხოვრებიდან მოდის.