9 რამ, რაც მშიერ კუჭზე არ შეიძლება - გიორგი ღოღობერიძის რჩევები

ქართველი ექიმი და ბიოქიმია-ფარმაკოლოგიის ლექტორი გიორგი ღოღობერიძე საზოგადოებაში დიდი ნდობით სარგებლობს, განსაკუთრებით მაშინ, როცა საქმე ცხოვრების ჯანსაღ წესსა და ყოველდღიური კვების მავნე ჩვევების შეცვლას ეხება. ერთ-ერთ ბოლო ვიდეოში, მან იმ საკვებსა და პროდუქტებზე ისაუბრა, რომელთა მიღებაც მშიერ კუჭზე არც ისე სასურველია - განსაკუთრებით იმ ადამიანებისთვის, ვისაც კუჭ-ნაწლავის სისტემასთან დაკავშირებული პრობლემები აწუხებს.

1. ცხარე საკვები

ექიმის თქმით, თუ ადამიანი კუჭის ან ნაწლავის დაავადებებს არ უჩივის, ცხარე საკვების მიღება მისთვის დიდი პრობლემას არ წარმოადგენს - არც კი კრძალავს მის მიღებას მშიერ კუჭზე. თუმცა, უკვე არსებული კუჭ-ნაწლავის პრობლემების შემთხვევაში, უმჯობესია ცხარე კერძებზე უარი თქვათ.

მითი: ცხარე საჭმელი კუჭის წყლულს იწვევს? ექიმი პასუხობს: არა, წყლულის გამომწვევი ჰელიკობაქტერიაა.

2. ზედმეტად ტკბილი პროდუქტები

უზმოზე შაქრიანი სასმელებისა თუ დესერტების მიღება ორგანიზმისთვის შოკის ტოლფასია - პანკრეასი დიდი რაოდენობით გამოყოფს ინსულინს, რასაც სისხლში შაქრის დონის მკვეთრი ვარდნა და ჰიპოგლიკემია მოჰყვება. შედეგი კი თავის ტკივილი და სისუსტე.

3. გაზიანი სასმელები

კოლას ტიპის სასმელებში შემავალი ფოსფორმჟავა განსაკუთრებით საზიანოა იმ ადამიანებისთვის, ვისაც უკვე აქვთ გასტრიტი ან კუჭში მომატებული მჟავიანობა. ის კიდევ უფრო აძლიერებს კუჭის მჟავურ რეაქციას.

4. ძალიან ცივი სასმელები

კუჭის ნორმალური ტემპერატურა დაახლოებით 37.6 გრადუსია. ძალიან ცივი სითხის მიღება კუჭის ლორწოვანი გარსის სისხლძარღვების სპაზმს იწვევს, რაც განსაკუთრებით საზიანოა მათთვის, ვისაც კუჭის ლორწოვანი გაღიზიანება ან ანთება აწუხებს.

5. ციტრუსები (ფორთოხალი, მანდარინი და სხვ.)

ამ ტიპის ხილში არსებული მჟავები (მათ შორის ფოსფორმჟავა) მშიერ კუჭზე ზედმეტ მარილმჟავას გამომუშავებას აიძულებს ორგანიზმს. რეკომენდებულია, მათი მიღება წყალში განზავებული სახით ან საჭმლის შემდეგ მოხდეს.

6. ყავა

უზმოზე კოფეინის მიღება ბევრ ადამიანს გულძმარვას ან კუჭის სიმძიმეს აძლევს. როგორც ღოღობერიძე განმარტავს, ყავა კუჭში მჟავიანობას ზრდის და კუჭის შიგთავსის საყლაპავში ამოსვლას უწყობს ხელს. ვისაც აღნიშნული სიმპტომები აწუხებს, ჯობს ყავის დალევა საუზმის შემდეგ გადადოს.

7. ტკივილგამაყუჩებელი პრეპარატები (ასპირინი, იბუპროფენი, ნაპროქსენი და სხვ.)

ასეთი მედიკამენტები ხელს უშლიან სპეციალური ფერმენტის – ციკლოქსიგენაზის – მუშაობას, რის გამოც კუჭი ვერ წარმოქმნის დამცავ ლორწოვან შრეს. ამის შედეგად კი მჟავა უშუალოდ აზიანებს კედლებს და იწვევს ტკივილს.

8. ალკოჰოლი

ექიმის თქმით, ალკოჰოლის უზმოზე მიღება მკაცრად არარეკომენდებულია. უმჯობესია მისი მოხმარება მხოლოდ საკვების მიღების შემდეგ მოხდეს, რათა ღვიძლმა ტოქსინები ეტაპობრივად დაამუშაოს.

9. მაღაზიაში წასვლა მშიერ კუჭზე

გიორგი ღოღობერიძემ ბოლოს ხუმრობით, თუმცა საკმაოდ პრაქტიკული რჩევაც გასცა – მშიერ კუჭზე მაღაზიაში წასვლა არ ღირს, რადგან მაშინ ყველაფრის ყიდვა მოგინდებათ, რაც მხოლოდ ზედმეტი ხარჯის და არასაჭირო საკვების შეძენის მიზეზი ხდება.

ექიმის ეს რჩევები განსაკუთრებით მნიშვნელოვანია მათთვის, ვინც კუჭის პრობლემებზე ხშირად ჩივის. თუმცა, ზოგადი პრევენციისთვისაც არ არის ურიგო მათი გათვალისწინება.