დედამიწას ძლიერი მზის შტორმი დაფარავს? - რა ელოდება ჩვენს პლანეტას

მეცნიერების გაფრთხილებით, დედამიწას ამ კვირაში ძლიერი მზის შტორმი უახლოვდება, რაც შესაძლოა გლობალურ დონეზე ენერგოსისტემების შეფერხებასა და ტრანსპორტის პარალიზებას გამოიწვევს. სპეციალისტების თქმით, კაცობრიობა ჯერ კიდევ სათანადოდ არ არის მზად მსგავსი მასშტაბის კოსმოსური ამინდის გამოწვევებისთვის.

გლობალური კვლევის ფარგლებში ჩატარებულმა სიმულაციებმა ცხადყო, რომ მზის ძლიერი ამოფრქვევების პირობებში აშშ-ის ენერგოსისტემებში მასობრივი გათიშვები დაფიქსირდებოდა, რადიოკავშირი და კომუნიკაციაც სერიოზულად შეფერხდებოდა.

სიმულაციაში ჩართული იყო რამდენიმე სცენარი, მათ შორის ისეთი, რომელიც ე.წ. "მზის სუპერშტორმს" მოიცავდა - მოვლენას, რომელსაც შეეძლო გამოეწვია ე.წ. "ინტერნეტ აპოკალიფსი", მრავალკვირიანი ელექტროენერგიის შეწყვეტით განსაკუთრებით აშშ-ის აღმოსავლეთ სანაპიროზე.

გარდა ენერგოსისტემისა, მზის შტორმის პოტენციური გავლენა გავრცელდება რკინიგზასა და მილსადენებზე, რაც ტრანსპორტისა და ლოგისტიკის შეფერხებებს, ასევე საწვავის ფასების ზრდას გამოიწვევს.

NASA-მ გაავრცელა გაფრთხილება, რომ დედამიწას უკვე უახლოვდება X კლასის მზის აფეთქებების შედეგად წარმოქმნილი შტორმი - ეს აფეთქებები ყველაზე ძლიერია და ხშირად თან ახლავთ კორონალური მასის ამოფრქვევები (CME), რომლებიც პლაზმისა და მაგნიტური ველის მძლავრ ნაკადს წარმოადგენენ.

19 მაისს დაფიქსირდა მზის ბოლო ძლიერი ამოფრქვევა, ხოლო ექსპერტები ვარაუდობენ, რომ მომდევნო დღეებში ასეთი მოვლენები შესაძლოა კვლავ განმეორდეს. NASA-ს თქმით, მზის აქტივობამ შეიძლება გავლენა იქონიოს რადიოკომუნიკაციებზე, ნავიგაციაზე, ელექტროქსელებსა და კოსმოსურ მოწყობილობებზე.

მზის აფეთქებები წარმოიშობა მზის ლაქებიდან და შესაძლოა გაგრძელდეს რამდენიმე წუთიდან რამდენიმე საათამდე. ისინი მნიშვნელოვანი რისკია როგორც კოსმოსში მოძრავი მოწყობილობებისთვის, ასევე დედამიწაზე არსებული ინფრასტრუქტურისთვის.

მეცნიერების სპეციალურად დამზადებულმა წვრთნებმა აჩვენა, რომ მზის აქტიური ზონების მონიტორინგი და სწრაფი რეაგირების გეგმების შემუშავება სასიცოცხლოდ მნიშვნელოვანია, რათა შევამციროთ პოტენციური ზიანი.

ამჟამად მზის ზედაპირზე რამდენიმე აქტიური ლაქაა დაფიქსირებული, ხოლო კიდევ ერთი აქტიური რეგიონი სამხრეთ-აღმოსავლეთ მხარეს აღინიშნება, რაც კიდევ უფრო ზრდის მომდევნო აფეთქებების ალბათობას.

მეტეოროლოგიური სამსახურის პროგნოზით, მზის აქტივობა შესაძლოა დაბალი დონით გაგრძელდეს, თუმცა იზოლირებული ზომიერი აფეთქებების ალბათობა ძალაში რჩება.