მაისში ქორწინება "არასასურველია"? – რას ამბობს მამა შალვა კეკელია გავრცელებულ მოსაზრებაზე
ხშირად გვესმის ხალხური თქმულება, თითქოს მაისში ქორწინება ან ნიშნობა წყვილს ბედნიერებას არ მოუტანს. საზოგადოებაში დამკვიდრებული ამ რწმენის გამო მაისი, როგორც წესი, ქორწილებით განსაკუთრებით დატვირთული თვე არ არის.
ამ გავრცელებულ მოსაზრებასთან დაკავშირებით სასულიერო პირი - ვაკის მაცხოვრის ფერიცვალების ტაძრის წინამძღვარი, მამა შალვა კეკელია გამოეხმაურა.
როგორც მან "პრაიმტაიმთან" საუბრისას განაცხადა, ეკლესიის სწავლებით მსგავსი შეზღუდვა არ არსებობს და მაისის თვეში დაოჯახება სრულად მისაღებია.
"ეკლესია წყვილებს ჯვარს არ წერენ მხოლოდ მარხვის დღეებში. აღდგომის შემდგომ პირველ კვირაშიც არ სრულდება ჯვრისწერა, მაგრამ რაც შეეხება მაისის თვეს - ეს უბრალოდ ფოლკლორული შეხედულებაა და არავითარი კავშირი არ აქვს სარწმუნოებასთან", - აღნიშნა მამა შალვამ.
მისივე თქმით, "არასწორია რწმენა, თითქოს ვარდის ყვავილობა ხელს უშლის ადამიანს ბედნიერებაში. ვისაც სჯერა, რომ მაისში დაქორწინება ცუდის მომტანია, უბრალოდ არ აქვს ბოლომდე გააზრებული საკუთარი ცხოვრების გადაწყვეტილებები."
"მაისი ერთ-ერთი ყველაზე ლამაზი თვეა - არც სიცივეა, არც სიცხე, ბუნება აყვავებულია და სწორედ ეს დროა იდეალური ჯვრისწერისთვის. ვინც ფიქრობს, რომ თვეა დამნაშავე მათი წარუმატებლობის, უნდა გადახედოს საკუთარ არჩევანებს", - ამბობს სასულიერო პირი.
საბოლოოდ, მამა შალვა კეკელიას თქმით, მაისში ქორწილის შიშის საფუძველი არ არსებობს და ყველაფერი დამოკიდებულია წყვილის მზადყოფნასა და გადაწყვეტილების სერიოზულობაზე.
